This section allows you to view all posts made by this member. Note that you can only see posts made in areas you currently have access to.
Topics - ਰਾਜ ਔਲਖ
Pages: 1 ... 17 18 19 20 21 [22] 23 24 25 26 27 ... 40
421
« on: December 13, 2011, 07:23:45 AM »
ਸਾਹਿਬਾਂ ਇੱਕ ਪਾਸੇ ਮਿਰਜ਼ਾ ਯਾਰ ਹੈ
ਇੱਕ ਪਾਸੇ ਵੀਰ ਸਿਆਲ।
ਵੇ ਮੈਂ ਦੋਂਹ ਪੁੜਾਂ ਵਿਚ ਪਿਸ ਗਈ
ਮੇਰਾ ਮਿਰਜ਼ਿਆ ਮੰਦੜਾ ਹਾਲ।
ਮਿਰਜ਼ਾ ਨੀ ਮੈਂ ਮਿਰਜ਼ਾ ਸਾਫ਼ ਜ਼ਮੀਰ ਦਾ
ਤੂੰ ਖੇਖਨ ਹੱਥੀਂ ਰੰਡ।
ਤੂੰ ਭਾਈਆਂ ਵੱਲ ਦੀ ਹੋ ਗਈ
ਇੱਕ ਯਾਰ ਦੀ ਲਾ ਕੇ ਕੰਡ।
ਮੇਰਾ ਤਰਕਸ਼ ਭੰਨਿਆ ਵੈਰਨੇ
ਰਹੇ ਪੰਛੀ ਪਾਉਂਦੇ ਡੰਡ।
ਕਿਸ ਦਗ਼ਾਬਾਜ਼ 'ਨਾ ਲਾ ਲਈਆਂ
ਮੈਨੂੰ ਤਾਅਨੇ ਦੇਂਦਾ ਜੰਡ।
_____________
422
« on: December 13, 2011, 05:58:35 AM »
ਹੱਥ ਮਹਿੰਦੀ ਰੰਗਲੇ ਕੋਈ ਫੁੱਲ ਤੋੜਨ ਜਾ ਰਿਹਾ
ਪੋਟਿਆਂ ਵਿਚ ਅੱਗ ਹੈ, ਨਾ ਫੂਕ ਦੇਵੇ ਗੁਲਜ਼ਾਰ ਨੂੰ।
ਖ਼ਤ ਹੁਸੀਨਾ ਦੇ ਹੀ ਮੇਰੀ ਲਾਸ਼ ਉੱਤੇ ਪਾ ਦਿਓ
ਕੌਣ ਕਫ਼ਨ ਲੈਣ ਸਾਡਾ ਜਾਏਗਾ ਬਾਜ਼ਾਰ ਨੂੰ।
_______________________
423
« on: December 13, 2011, 05:39:18 AM »
ਅਸੰਖ ਮੂਰਖ ਅੰਧ ਘੋਰ।।
ਅਸੰਖ ਚੋਰ ਹਰਾਮਖੋਰ।।
ਅਸੰਖ ਮਲੇਛ ਮਲੁ ਭਖਿ ਖਾਹਿ।।
ਗੁਰੂ ਨਾਨਕ ਦੇਵ ਜੀ ਨੇ 'ਜਪੁਜੀ ਸਾਹਿਬ' ਵਿੱਚ ਕਿੰਨਾ ਸੋਹਣਾ ਲਿਖਿਆ ਹੈ ਅਸੀਂ ਹਰ ਰੋਜ਼ ਪਾਠ ਕਰਦੇ ਹਾਂ ਪਰ ਫਿਰ ਵੀ ਬੇਈਮਾਨੀ, ਚੋਰ ਬਾਜ਼ਾਰੀ ਅਤੇ ਹੇਰਾ ਫੇਰੀ ਕਰਦੇ ਡਰਦੇ ਨਹੀਂ।
_________________________________________________________________________________________________
424
« on: December 13, 2011, 05:04:27 AM »
ਇਹ ਗੱਲ ਜਿਹੜੀ ਮੈਂ ਕਹਿੰਦਾ ਹਾਂ, ਇਹ ਗੱਲ ਕੋਈ ਆਮ ਨਹੀਂ ਏ।
ਝੂਠ ਨਾ ਬੋਲੋ ਮੇਰੇ ਯਾਰੋ, ਇਸ਼ਕ ਮੇਰਾ ਨਾਕਾਮ ਨਹੀਂ ਏ।
ਮੈਨੂੰ ਕੱਲੇ ਨੂੰ ਕਿਉਂ ਆਖੋਂ, ਬਾਕੀ ਵੀ ਦਰ ਜਾ ਕੇ ਦੇਖੋ
ਕਿਹੜਾ ਜੇਸ ਗੁਨਾਹ ਨਹੀਂ ਕੀਤਾ, ਕਿਹੜਾ ਜੋ ਬਦਨਾਮ ਨਹੀਂ ਏ।
ਮਿਹਨਤ ਦੇ ਨਾਲ ਹਰ ਥਾਂ ਪਹੁੰਚੂੰ ਜਿੱਥੇ ਵੀ ਮੈਂ ਜਾ ਸਕਦਾ ਹਾਂ
ਮੇਰੀ ਮੰਜ਼ਿਲ ਇਕ ਨਹੀਂ ਏ, ਮੇਰਾ ਇਕ ਮੁਕਾਮ ਨਹੀਂ ਏ।
ਕੀ ਹੋਇਆ ਜੇ ਹੋਰ ਕੋਈ ਤੂੰ ਦੋਸ਼ ਮੇਰੇ 'ਤੇ ਲਾ ਦਿੱਤਾ ਹੈ
ਕਿਹੜਾ ਮੌਕਾ ਜਦ ਮੇਰੇ 'ਤੇ ਲਾਇਆ ਤੂੰ ਇਲਜ਼ਾਮ ਨਹੀਂ ਏ।
ਵੱਢ ਵੱਢ ਖਾਂਦੇ ਮੇਰੇ ਮਨ ਨੂੰ ਆਪਣੇ ਘਰ ਦੇ ਫ਼ਿਕਰ ਬੜੇ ਨੇ
ਮੇਰੇ ਯਾਰਾ ਮੇਰੀ ਤਾਂ ਇਹ ਤੇਰੇ ਵਰਗੀ ਸ਼ਾਮ ਨਹੀਂ ਏ।
____________________________
425
« on: December 13, 2011, 02:22:22 AM »
ਇਹ ਮਾਰੂਥਲ ਹੀ ਏ ਹਾਲੇ, ਅਜੇ ਆਏ ਕਿਨਾਰੇ ਨਹੀਂ।
ਜਿਹੜੀ ਥਾਂ ਪਹੁੰਚ ਗਏ ਆਪਾਂ, ਇਹੇ ਆਪਣੇ ਦੁਆਰੇ ਨਹੀਂ।
ਅਜੇ ਮੰਜ਼ਲ 'ਤੇ ਜਾਣਾ ਹੈ, ਅਜੇ ਆਸ਼ਾ ਨੂੰ ਪਾਣਾ ਹੈ
ਅਜੇ ਨਹੀਂ ਹੌਸਲਾ ਮਰਿਆ, ਅਜੇ ਤਾਂ ਪੈਰ ਹਾਰੇ ਨਹੀਂ।
ਤਲੀ 'ਤੇ ਸੀਸ ਧਰਿਆ ਹੈ, ਤੁਹਾਡੇ ਨਾਲ ਹਾਂ ਮੈਂ ਵੀ
ਇਹੇ ਇਕਰਾਰ ਹੈ ਮੇਰਾ, ਕੋਈ ਝੂਠੇ ਤਾਂ ਲਾਰੇ ਨਹੀਂ।
ਕਿਉਂ ਜ਼ਾਲਮ ਭਲਾ ਸਾਨੂੰ ਐਵੇਂ ਨਿਰਮੂਲ ਹੀ ਮੰਨੇਂ
ਅਸੀਂ ਤਾਂ ਭਖਦੇ ਸੂਰਜ ਹਾਂ, ਕੋਈ ਬੁਝਦੇ ਅੰਗਾਰੇ ਨਹੀਂ।
ਜਿਨ੍ਹਾਂ ਦੇ ਪੇਟ ਭੁੱਖੇ ਨੇ, ਜਿਨ੍ਹਾਂ ਨੇ ਪਹਿਨੀਆਂ ਲੀਰਾਂ
ਇਹੇ ਲੋਕਾਂ ਦੇ ਮਾਰੇ ਨੇ, ਇਹੇ ਕਿਸਮਤ ਦੇ ਮਾਰੇ ਨਹੀਂ।
___________________________
426
« on: December 12, 2011, 11:56:39 PM »
ਤੇਰੇ ਨਾਲ ਹੀ ਰਾਤ ਪਿਆਰੀ ਲਗਦੀ ਹੈ।
ਤੂੰ ਹੋਵੇਂ, ਬਰਸਾਤ ਪਿਆਰੀ ਲਗਦੀ ਹੈ।
ਜਿਸ ਦਿਨ ਤੈਨੂੰ ਮਿਲਣੇ ਦਾ ਇਕਰਾਰ ਹੋਵੇ
ਉਸ ਦਿਨ ਦੀ ਪ੍ਰਭਾਤ ਪਿਆਰੀ ਲਗਦੀ ਹੈ।
ਪਿਆਰ 'ਚ ਬੋਲੇਂ ਜਾਂ ਤੂੰ ਬੋਲੇਂ ਰੰਜਸ਼ ਵਿੱਚ
ਤੇਰੀ ਹਰ ਇਕ ਬਾਤ ਪਿਆਰੀ ਲਗਦੀ ਹੈ।
ਕੀ ਹੋਇਆ ਜੇ ਤੈਥੋਂ ਮਿਲੀਆਂ ਪੀੜਾਂ ਹੀ
ਤੇਰੀ ਹਰ ਸੌਗਾਤ ਪਿਆਰੀ ਲਗਦੀ ਹੈ।
ਮੈਨੂੰ ਤਾਂ ਇਨਸਾਨ ਪਿਆਰੇ ਲਗਦੇ ਨੇ
ਕੁਝ ਲੋਕਾਂ ਨੂੰ ਜ਼ਾਤ ਪਿਆਰੀ ਲਗਦੀ ਹੈ।
_____________________
427
« on: December 12, 2011, 09:27:55 PM »
ਮੇਰੀ ''ਹੋਂਦ" ਤੇ ਤੇਰੇ ''ਵਜੂਦ" ਵਿੱਚ
ਇਕ ਦੂਰੀ ਜਿਹੀ ਸੀ
ਜੋ ਅੱਜ ਮੁੱਕ ਗਈ ਏ
ਹੁਣ ਮਨ ਦੇ ਹਨੇਰੇ ਵਿੱਚ
ਉਹ ਨੂਰੀ ''ਜੋਤ"
ਜਜ਼ਬਾਤ, ਭਾਵਨਾਵਾਂ
ਤੇਰੇ ਦੁੱਖ, ਮੇਰੇ ਦੁੱਖ
ਹਾਸੇ, ਹਉਕੇ
ਸੱਧਰਾਂ ਤੇ ਚਾਅ
ਸਾਂਝੇ ਜਿਹੇ ਜਾਪਦੇ ਨੇ....
ਤੇਰਾ ਮਿਲਣਾ
ਇਕ ਇਤਫ਼ਾਕ ਤਾਂ ਨਹੀਂ ਹੋ ਸਕਦਾ
ਕਿਉਂਕਿ
ਦਿਲ ਵਿੱਚ ਘਰ ਕਰ ਜਾਣ ਵਾਲੀ
ਤੇਰੀ ਅਦਾ
ਜਾਣੀ ਪਹਿਚਾਣੀ ਜਿਹੀ ਲਗਦੀ ਏ
ਮੇਰੀ ਹੋਂਦ
ਤੇਰੇ ਵਜੂਦ ਦਾ
ਹਿੱਸਾ ਬਣ ਗਈ ਏ
ਸ਼ਾਇਦ....
ਸਾਨੂੰ ਦੋਹਾਂ ਨੂੰ
ਇਸ ਮੌਕੇ ਦੀ ਤਲਾਸ਼ ਸੀ....
ਜਦੋਂ ਦਿਲ ਦਾ ਦਰਦ
ਇਕ ਨਾਸੂਰ ਬਣ ਕੇ ਰਿਸਦਾ ਏ
ਤਾਂ....
ਕਿਸੇ ਆਪਣੇ ਦਾ ਇੰਤਜ਼ਾਰ ਹੁੰਦਾ ਹੈ
ਜਿਹੜਾ ਇਨ੍ਹਾਂ ਜ਼ਖਮਾਂ ਤੇ
ਮਰਹਮ ਲਾ ਸਕੇ....
ਕੀ ਤੇਰੇ ਮੇਰੇ ਵਿਚਲੀ ਸਾਂਝ ਦਾ ਕਾਰਨ
ਇਹ ਦਰਦ ਏ???
ਕੁਝ ਬੋਲ ਨੇ??
ਜਾਂ ਫਿਰ ਉਹ ਅਹਿਸਾਸ ਏ
ਜਿਸਨੂੰ....
ਪਿਆਰ ਕਹਿੰਦੇ ਨੇ....???
______________
428
« on: December 12, 2011, 08:51:03 PM »
ਕੁਝ ਚਿਰ ਆਇਆ ਸੀ
ਉਹਨਾਂ ਦੇ ਫੁੰਕਾਰਿਆਂ 'ਤੇ ਰੋਸ ਜਿਹਾ
ਫੇਰ ਮਨ ਦੇ ਮੋਰ ਨੇ
ਸੱਪਾਂ ਦੇ ਸਿਰਾਂ 'ਤੇ ਨੱਚਣਾ ਸਿੱਖ ਲਿਆ
____________________
429
« on: December 12, 2011, 11:24:48 AM »
ਕੰਧਾਂ 'ਤੇ ਦਿਲ ਦੀਆਂ ਤੂੰ ਦੀਪ ਜਗਾ ਰੱਖੀਂ
ਨੈਣਾ 'ਚ ਸੰਦਲੀ ਜਿਹੇ ਤੂੰ ਖ਼ਾਅਬ ਸਜਾ ਰੱਖੀਂ
ਤੂੰ ਹੀ ਬਦਲੇਂਗਾ ਇਹ ਫਿਜ਼ ਜੋ 'ਕਜ਼ਾ' ਬਣੀ
ਰੌਸ਼ਨ ਮਿਨਾਰਾਂ ਨੂੰ ਤੂੰ ਦਿਲ ਵਿੱਚ ਵਸਾ ਰੱਖੀਂ।
________________________
430
« on: December 12, 2011, 10:26:28 AM »
ਰੱਬ ਕਾਦਰ ਕਰੀਮ ਰਹੀਮ ਐਸਾ, ਕੋਈ ਰਹੀਮ ਨਹੀਂ ਅੱਲਾ ਪਾਕ ਵਰਗਾ
ਦੁਨੀਆਦਾਰੀ ਦੇ ਸਾਰੇ ਰਿਸ਼ਤਿਆਂ ਵਿਚ, ਕੋਈ ਸਾਕ ਨੀ ਮਾਂ ਦੇ ਸਾਕ ਵਰਗਾ
ਪੁੱਤਰ ਭਾਵੇਂ ਜਮਾਨੇ ਦਾ ‘ਬੌਸ’ ਹੋਵੇ, ਨਹੀਂ ਉਹ ਮਾਂ ਦੇ ਪੈਰਾਂ ਦੀ ਖਾਕ ਵਰਗਾ
ਜਿਸ ਹਾਲ ਦੇ ਵਿਚ ਹੋਵੇ ਮਾਂ ਰਾਜੀ ਓਸੇ ਹਾਲ ਦੇ ਵਿਚ ਤੂੰ ਜੀ ਲਿਆ ਕਰ
ਉੱਚਾ ਬੋਲ ਨਾ ਮਾਂ ਤੋਂ ਬੋਲ ਬੈਠੀਂ, ਮਾਂ ਸਾਹਮਣੇ ਲਬਾਂ ਨੂੰ ਸੀ ਲਿਆ ਕਰ
ਜਦੋਂ ਤੈਨੂੰ ਸਕੂਨ ਦੀ ਲੋੜ ਹੋਵੇ, ਪੈਰ ਮਾਂ ਦੇ ਧੋਕੇ ਪੀ ਲਿਆ ਕਰ
ਅਜਮਤ ਓਸ ਇਨਸਾਨ ਦੀ ਬੜੀ ਹੁੰਦੀ, ਰਾਜੀ ਜਿਸਤੇ ਸੱਜਣੋ ਮਾਂ ਹੋਵੇ
ਜਿਹੜਾ ਝੁਕਦਾ ਮਾਂ ਦੇ ਵਿਚ ਕਦਮਾਂ, ਉਹ ਬੰਦਾ ਜ਼ਮਾਨੇ ਤੇ ਤਾਂ ਹੋਵੇ
ਰੁਤਬਾ ਮਾਂ ਦਾ ਰੱਬ ਬੁਲੰਦ ਕੀਤਾ ਸਾਨੀ ਮਾਂ ਦਾ ਵਿਚ ਸੰਸਾਰ ਕੋਈ ਨੀ
ਦਰਦੀ ਕੋਈ ਨਹੀਂ ਮਾਂ ਦੇ ਦਿਲ ਵਰਗਾ, ਮਾਂ ਵਾਂਗੂੰ ਕਰਦਾ ਪਿਆਰ ਕੋਈ ਨੀ
ਜੀਹਦੀ ਕੰਡ ਤੇ ਮਾਂ ਦਾ ਹੱਥ ਹੋਵੇ, ਉਹਨੂੰ ਦੋਵਾਂ ਜਹਾਨਾਂ ’ਚ ਹਾਰ ਕੋਈ ਨੀ
ਮਾਂ ਦੀ ਮਾਮਤਾ ਸੱਚਾ ਏ ਪਿਆਰ ਐਸਾ, ਜੀਹਦੇ ਵਿਚ ਦਿਖਾਵੇ ਦੀ ਬਾਤ ਕੋਈ ਨੀ
ਬਾਅਦ ਰੱਬ ਰਸੂਲ ਦੀ ਜਾਤ ਨਾਲੋਂ, ਵੱਧ ਮਾਂ ਦੀ ਜਾਤ ਤੋਂ ਜਾਤ ਕੋਈ ਨੀ
ਜਿਹੜੀ ਲੰਘੇ ਮਾਂ ਦੀ ਵਿਚ ਖਿਦਮਤ, ਇਹੋ ਜਿਹੀ ਇਬਾਦਤ ਦੀ ਰਾਤ ਕੋਈ ਨੀ
ਪੁੱਤਰ ਭਾਵੇਂ ਜ਼ਮਾਨੇ ਦਾ ਹੋਵੇ ਐਬੀ, ਮਾਂ ਫੇਰ ਵੀ ਪਰਦੇ ਕੱਜਦੀ ਏ
ਨਾ ਫੁਰਮਾਨ ਤੇ ਭਾਵੇਂ ਮੁਸਤਾਖ ਹੋਵੇ, ਸਿਫਤਾਂ ਕਰ ਕਰ ਮਾਂ ਨਾ ਰੱਜਦੀ ਏ
ਛੇਆਂ ਕੋਹਾਂ ਤੇ ਪੁੱਤਰ ਨੂੰ ਲੱਗੇ ਠੇਡਾ, ਸੱਟ ਮਾਂ ਦੇ ਸੀਨੇ ’ਚ ਵੱਜਦੀ ਏ
ਤਾਂ ਹੀ ਮਾਂ ਦਾ ਅਜਬ ਮੈਂ ਪਿਆਰ ਡਿੱਠਾ, ਖਾਂਦਾ ਪੁੱਤਰ ਤੇ ਮਾਂ ਪਈ ਰੱਜਦੀ ਏ
ਜਾਵਾਂ ਸਦਕੇ ਮਾਂ ਦੇ ਨਾਂ ਉੱਤੋਂ, ਮਾਂ ਆਖਿਆਂ ਸੀਨੇ ’ਚ ਠੰਢ ਪੈਂਦੀ
ਨਾਲ ਪਿਆਰ ਦੇ ਜਦੋਂ ਵੀ ਮਾਂ ਕਹੀਏ, ਇੰਜ ਲਗਦਾ ਮੂੰਹ ’ਚ ਖੰਡ ਪੈਂਦੀ
ਜਿਹੜਾ ਮਾਂ ਨੂੰ ਦਏ ਨਾ ਕੰਡ ਯਾਰੋ, ਉਹਦੀ ਕਦੇ ਵੀ ਭੁੰਜੇ ਨੀ ਕੰਡ ਪੈਂਦੀ
ਨਿਹਮਤ ਬਦਲ ਕੋਈ ਜੱਗ ਤੇ ਮਾਂ ਦਾ ਨਹੀਂ, ਕਰੇ ਲੱਖ ਜਮਾਨਾ ਪਿਆਰ ਭਾਵੇਂ
ਦੇਣ ਮਾਂ ਦਾ ਕੋਈ ਨਹੀਂ ਦੇ ਸਕਦਾ, ਪੁੱਤਰ ਜਾਨ ਵੀ ਦੇਵੇ ਵਾਰ ਭਾਵੇਂ
ਕੋਈ ਸਾਥ ਨੀ ਮਾਂ ਦੇ ਸਾਥ ਵਰਗਾ, ਸਾਗਰ ਵੇਖ ਲੈ ਫੋਲ ਸੰਸਾਰ ਭਾਵੇਂ
_____________________________________
431
« on: December 12, 2011, 09:36:07 AM »
ਤੁਰ ਗਿਆ ਸੀ ਜੋ ਸਵੇਰਾ ਜਾਣ ਕੇ!
ਆ ਗਿਆ ਵਾਪਸ ਹਨ੍ਹੇਰਾ ਛਾਣ ਕੇ!
ਕਿਸ ਤਰ੍ਹਾਂ ਯਾਦਾਂ ਦਾ ਪੱਲਾ ਛੱਡ ਦਿਆਂ
ਰਾਤ ਸਾਰੀ ਸੁਪਨਿਆਂ ਵਿਚ ਮਾਣ ਕੇ!
ਪਰਤਿਆ ਆਖ਼ਰ ਨੂੰ ਮੇਰੇ ਹੀ ਦੁਆਰ
ਤੁਰ ਗਿਆ ਜਿਹੜਾ ਸੀ ਪੱਕੀ ਠਾਣ ਕੇ।
ਕਿਸ ਤਰ੍ਹਾਂ ਭੁੱਲਾਂ ਉਹਦਾ ਇਹਸਾਨ, ਜੋ
ਦੇ ਗਿਆ ਬਿਰਹਾ ਦੇ ਤੰਬੂ ਤਾਣ ਕੇ।
ਸਫ਼ਲਤਾ ਨਿਕਲੀ ਨਿਰੀ ਧੋਖਾ ਫ਼ਰੇਬ
ਅਪਣਾ ਲਈ ਸੀ ਮੈਂ ਜੋ ਅਪਣੀ ਜਾਣ ਕੇ।
ਸਾਧੂਆਂ ਦੀ ਜ਼ਿੰਦਗੀ ਹੁਣ ਜੀਅ ਰਿਹਾਂ
ਦੇਖ ਲਈ ਜ਼ਿੰਦਗੀ ਬਥੇਰੀ ਮਾਣ ਕੇ।
ਰਹਿਣ ਦੇਵੋ ਭੇਦ ਮੇਰੇ ਭੇਦ ਹੀ
ਕੀ ਕਰੋਗੇ ਭੇਦ ਮੇਰੇ ਜਾਣ ਕੇ।
_______________
432
« on: December 12, 2011, 07:02:28 AM »
ਸੁਪਨੇ ਦੇ ਵਿੱਚ ਤੁਸੀਂ ਮਿਲੇ ਅਸਾਨੂੰ
ਅਸਾਂ ਧਾ ਗਲਵਕੜੀ ਪਾਈ।
ਨਿਰਾ ਨੂਰ ਤੁਸੀਂ ਹੱਥ ਨਾ ਆਏ
ਸਾਡੀ ਕੰਬਦੀ ਰਹੀ ਕਲਾਈ।
_______________
433
« on: December 12, 2011, 06:33:58 AM »
ਜੀਅ ਕਰਦਾ ਏ ਸਿਗਰਟ ਵਾਂਗੂੰ ਅਪਣੀ ਉਮਰ ਧੁਖਾਵਾਂ।
ਸਾਗਰ ਦੇ ਵਿਚ ਮਛਲੀ ਵਾਂਗਰ ਭਟਕਾਂ ਤੇ ਮਰ ਜਾਵਾਂ।
ਹਾਲੇ ਵੀ ਇਸ ਦਿਲ ਚੰਦਰੇ ਨੇ ਆਸ ਕਿਸੇ 'ਤੇ ਲਾਈ
ਢਲ ਚੱਲੀਆਂ ਨੇ ਸ਼ਾਮਾਂ ਜਦ ਕਿ ਢਲ ਚੱਲਿਆ ਪਰਛਾਵਾਂ।
ਮਕਤਲ ਦੇ ਵਿੱਚ ਘਰ ਹੈ ਮੇਰਾ ਮਕਤਲ ਦੇ ਵਿਚ ਵਾਸਾ
ਰੋਜ਼ ਦਿਹਾੜੇ ਕੂਕਦੀਆਂ ਨੇ ਓਪਰੀਆਂ ਘਟਨਾਵਾਂ।
ਹੋਈ ਉਮਰ ਬਿਹਾਗਣ ਮੇਰੀ, ਜਿੰਦ ਨੂੰ ਲੱਗਾ ਝੋਰਾ
ਇਕ ਪਲ ਤੈਨੂੰ ਮੋਹ ਲੈਣੇ ਦੀਆਂ ਕਿੰਨੀਆਂ ਘੋਰ ਸਜ਼ਾਵਾਂ।
ਸੌ ਪੀੜਾਂ ਹਨ ਖੜ੍ਹੀਆਂ ਮੇਰੇ ਘਰ ਦਹਿਲੀਜ਼ ਦੇ ਉੱਤੇ
ਕਿਹੜੀ ਪੀੜਾ ਛੱਡ ਦਿਆਂ ਤੇ ਕਿਹੜੀ ਨੂੰ ਪਰਨਾਵਾਂ?
ਜੰਗਲ ਵਰਗੇ ਦੇਸ਼ ਦੇ ਅੰਦਰ ਮਾਰੂਥਲ ਜਿਹਾ ਸ਼ਹਿਰ
ਜਦ ਵੀ ਕੋਈ ਪੁੱਛੇ ਦੱਸਾਂ ਮੈਂ ਅਪਣਾ ਸਿਰਨਾਵਾਂ।
_________________________
434
« on: December 12, 2011, 05:51:40 AM »
ਲੰਘ ਗਏ ਉਹ ਕੋਲ ਦੀ ਕੁਝ ਇਸ ਅਦਾ ਦੇ ਨਾਲ।
ਪੱਤਾ ਜਿਉਂ ਗੁਜ਼ਰੇ ਕੋਈ ਚਲਦੀ ਹਵਾ ਦੇ ਨਾਲ।
ਜਿੰਨੇ ਜ਼ਿਆਦਾ ਕਰ ਰਿਹਾ ਕੋਈ ਗੁਨਾਹ ਹੈ ਰੋਜ਼
ਓਨੀ ਜ਼ਿਆਦਾ ਲਗਨ ਹੈ ਉਸਦੀ ਖ਼ੁਦਾ ਦੇ ਨਾਲ।
ਜਿਸਨੇ ਕਦੇ ਨਹੀਂ ਸੋਚਿਆ ਲਾ ਕੇ ਨਿਭਾਉਣ ਦਾ
ਲਾਈਏ ਜੇ ਦਿਲ ਤਾਂ ਕਿਸ ਤਰਾਂ ਉਸ ਬੇਵਫ਼ਾ ਦੇ ਨਾਲ।
ਵਰਨਾ ਇਹ ਦਿਲ ਵੀ ਦਿਲ ਸੀ ਕੀ ਖ਼ੁਸ਼ੀਆਂ ਬਖੇਰਦਾ
ਰੋਂਦਾ ਏ ਹੁਣ ਤਾਂ ਰਹਿ ਗਿਆ ਤੇਰੀ ਵਜ੍ਹਾ ਦੇ ਨਾਲ।
ਤੇਰੇ ਬਗ਼ੈਰ ਭਾਅ ਰਹੀ ਕੋਈ ਬਹਾਰ ਨਾ
ਜ਼ਿੰਦਗੀ ਲੰਘਾ ਰਿਹਾਂ ਮੈਂ ਹੁਣ ਗ਼ਮ ਦੇ ਸ਼ੁਦਾ ਦੇ ਨਾਲ।
___________________________
435
« on: December 12, 2011, 04:55:48 AM »
ਸੌਖੀਆਂ ਹੁੰਦੀਆਂ ਨੇ ਗੱਲਾਂ ਕਰਨੀਆਂ।
ਔਖੀਆਂ ਹੁੰਦੀਆਂ ਝਨਾਵਾਂ ਤਰਨੀਆਂ।
ਸੌਖਾ ਦੂਜੇ ਦਾ ਉਡਾਉਣਾ ਹੈ ਮਖ਼ੌਲ
ਔਖੀਆਂ ਗੱਲਾਂ ਨੇ ਆਪੂੰ ਜਰਨੀਆਂ।
ਐਂਵੇਂ ਨਾ 'ਮਨਸੂਰ' ਦੀ ਪਦਵੀ ਮਿਲੇ
ਪੈਂਦੀਆਂ ਲੱਖਾਂ ਸਜ਼ਾਵਾਂ ਭਰਨੀਆਂ।
ਇਸ਼ਕ ਵਿੱਚ ਮੰਗਾਂ ਨਾ ਮੈਂ ਕੋਈ ਲਿਹਾਜ਼
ਆ ਗਈਆਂ ਮੈਨੂੰ ਸਜ਼ਾਵਾਂ ਜਰਨੀਆਂ।
ਰਲ ਕੇ ਸਾਡੇ ਦੁਸ਼ਮਣਾਂ ਦੇ ਨਾਲ 'ਮਾਨ'
ਆ ਗਈਆਂ ਗੱਲਾਂ ਨੇ ਤੈਨੂੰ ਕਰਨੀਆਂ।
___________________
436
« on: December 12, 2011, 04:13:57 AM »
ਜ਼ਿੰਦਗੀ ਦੇ ਵਿਚ ਹਰ ਮੌਸਮ ਮੈਂ ਕੱਪੜੇ ਜਿਉਂ ਹੰਢਾਇਆ ਹੈ।
ਪਰ ਕੋਈ ਵੀ ਮੌਸਮ ਮੇਰੇ ਦਿਲ ਨੂੰ ਰਾਸ ਨਾ ਆਇਆ ਹੈ।
ਚੋਟਾਂ ਖਾ ਖਾ ਮੰਜ਼ਿਲ ਉੱਤੇ ਆਖ਼ਰ ਨੂੰ ਮੈਂ ਪਹੁੰਚ ਗਿਆਂ
ਜ਼ਿੰਦਗੀ ਨੇ ਹਰ ਮੋੜ 'ਤੇ ਮੈਨੂੰ ਪੱਥਰ ਜਿਉਂ ਅਜ਼ਮਾਇਆ ਹੈ।
ਕੌੜੇ ਪਲ ਹੰਢਾਉਂਦਿਆਂ ਮੈਂ ਤਾਂ ਅੱਧੀ ਉਮਰ ਗੁਜ਼ਾਰੀ ਹੈ
ਮਿੱਠਾ ਪਲ ਮਤਰੇਈ ਵਾਂਗੂੰ ਮੇਰੇ ਰਾਸ ਨਾ ਆਇਆ ਹੈ।
ਮੈਂ ਤਾਂ ਆਪਣਾ ਦਿਲ ਡੋਲਣ ਤੋਂ ਪੱਥਰ ਕਰਕੇ ਸਾਂਭ ਲਿਆ
ਰੋਜ਼ ਹੀ ਫੁੱਲਾਂ ਕਲੀਆਂ ਨੇ ਤਾਂ ਦਿਲ ਮੇਰਾ ਭਰਮਾਇਆ ਹੈ।
ਕਹਿੰਦਾ ਸੀ ਜੋ ਹਾਕ ਤੇਰੀ 'ਤੇ ਝੱਟ ਪੱਟ ਹਾਜ਼ਰ ਹੋਵਾਂਗਾ
ਲਗਦਾ ਉਸਨੇ ਦਿਲ ਰੱਖਣ ਲਈ ਮੈਨੂੰ ਲਾਰਾ ਲਾਇਆ ਹੈ।
ਪੱਤਝੜਾਂ ਦੇ ਪੱਤੇ ਵਾਂਗੂੰ ਰੁਲਦਾ ਫਿਰਦਾਂ ਥਾਂ ਥਾਂ 'ਤੇ
ਕਿਸਮਤ ਨੇ ਹਰ ਪਾਸੇ ਮੈਨੂੰ ਉਸਦੇ ਵਾਂਗ ਉਡਾਇਆ ਹੈ।
_____________________________
437
« on: December 12, 2011, 03:21:38 AM »
ਖੋਲ੍ਹੇ, ਟਿੱਬੇ, ਰੇਤੇ, ਖੰਡਰ, ਇਹ ਕੇਹੀਆਂ ਨੇ ਰਾਹਵਾਂ?
ਪੈਰਾਂ ਦੇ ਵਿੱਚ ਛਾਲੇ ਪੈ ਗਏ, ਫਿਰ ਵੀ ਤੁਰਦਾ ਜਾਵਾਂ।
ਰੇਤੇ ਦੇ ਵਿੱਚ ਲਹਿਰਾਂ ਛੱਡੇਂ, ਪਾਣੀ ਉੱਤੇ ਪੈੜਾਂ
ਕਲਾ ਤੇਰੀ ਦਾ ਜਾਦੂ ਹੈ ਜਾਂ ਤੇਰੀਆਂ ਸ਼ੋਖ਼ ਅਦਾਵਾਂ।
ਰਾਹਾਂ ਦੇ ਵਿੱਚ ਕੰਡੇ ਖਿੱਲਰੇ, ਵਗਣ ਤਪਦੀਆਂ ਲੂਆਂ
'ਕੱਲਮ-ਕੱਲਾ ਤੁਰਿਆ ਜਾਵਾਂ, ਨਾਲ ਮੇਰਾ ਪਰਛਾਵਾਂ।
ਪੱਤਝੜ ਦਾ ਰੁੱਖ ਮੇਰੇ ਘਰ ਦੇ ਵਿਹੜੇ ਦੇ ਵਿੱਚ ਲੱਗਾ
ਲੋੜ ਪਵੇ ਜਦ ਮੈਨੂੰ ਤਾਂ ਮੈਂ ਉਸ ਤੋਂ ਮੰਗਾਂ ਛਾਵਾਂ।
ਮਾਰੂਥਲ ਵਿੱਚ ਉੱਗਿਆ ਜੀਕੂੰ ਕੋਈ ਰੁੱਖ ਨਿਮਾਣਾ
ਮੇਰੀ ਜ਼ਿੰਦਗੀ ਦਾ ਵੀ ਏਸੇ ਵਰਗਾ ਹੈ ਸਿਰਨਾਵਾਂ।
ਅੱਗ 'ਚ ਜੀਵਾਂ, ਅੱਗ 'ਚ ਖੇਡਾਂ, ਅੱਗ 'ਚ ਹੱਸਾਂ ਰੋਵਾਂ
ਛੋਟੀ ਉਮਰੇ ਅੱਗ ਦਾ ਮੈਨੂੰ ਪੈ ਗਿਆ ਸੀ ਪਰਛਾਵਾਂ।
___________________________
438
« on: December 12, 2011, 02:53:59 AM »
ਤੇਰੇ ਹੁੰਦਿਆਂ ਸ਼ਹਿਰ ਇਹ ਆਬਾਦ ਸੀ।
ਹਰ ਗੁਲਾਮੀ ਤੋਂ ਏਹੇ ਆਜ਼ਾਦ ਸੀ।
ਇਕ ਗੱਲ ਆਖੀ ਕਿਸੇ ਨੇ, ਅੱਗ ਲੱਗੀ
ਸ਼ਹਿਰ ਸਾਰਾ ਹੋ ਗਿਆ ਬਰਬਾਦ ਸੀ।
'ਕਤਲ ਤੇਰਾ ਦੇਊਗਾ ਬਦਨਾਮੀਆਂ'
ਕਹਿ ਰਿਹਾ ਮੈਨੂੰ ਮੇਰਾ ਜ਼ਲਾਦ ਸੀ।
ਦੇਰ ਬਾਦ ਖ਼ਤ ਸੀ ਆਇਆ, ਲਿਖਿਆ ਸੀ
ਮੈਂ ਤੇਰੇ ਨਾਲ ਖੁਸ਼ ਅਤੇ ਆਬਾਦ ਸੀ।
ਮੈਂ ਜਦੋਂ ਮਕਤਲ ਦੇ ਕੋਲੋਂ ਲੰਘਿਆ
ਉਸਨੂੰ ਮੇਰਾ ਕਤਲ ਹਾਲੇ ਯਾਦ ਸੀ।
ਅੱਗ ਦੇ ਨਾਲ ਦੋਸਤੀ ਪਾਇਆ ਨਾ ਕਰ
ਉਸਦਾ ਏਹੇ ਹੁਕਮ ਜਾਂ ਫ਼ਰਿਆਦ ਸੀ?
___________________
439
« on: December 12, 2011, 01:51:23 AM »
ਕੌਣ ਕਰੇ ਇਤਬਾਰ ਇਨ੍ਹਾਂ ਦੇ ਲਾਰੇ ਤੇ?
ਕਿੰਨਾਂ ਚਿਰ ਕੋਈ ਜੀਵੇ ਫੋਕੇ ਨਾਹਰੇ ਤੇ?
ਰੋਟੀ, ਕਪੜਾ, ਕੁੱਲੀ ਹੀ ਤਾਂ ਚਾਹੀਦੀ
ਕਾਹਨੂੰ ਲਾਇਆ ਜ਼ੋਰ ਹੈ ਏਸ ਪਸਾਰੇ ਤੇ?
ਇਸਦੇ ਲਹੂ ਦਾ ਕਰਜ਼ਾ ਕਿੱਦਾਂ ਲਾਹੋਗੇ
ਤਰਸ ਕਰੋ ਕੁਝ ਏਸ ਗਰੀਬੀ ਮਾਰੇ ਤੇ।
ਇਸ ਕੋਠੀ ਵਿੱਚ ਲੋਕ ''ਭਲੇ" ਜਿਹੇ ਰਹਿੰਦੇ ਨੇ
ਰੋਜ਼ ਤਸ਼ੱਦਦ ਹੁੰਦਾ ਏਸ ਚੁਬਾਰੇ ਤੇ।
ਸੂਰਜ ਚੜ੍ਹ ਪਏ ਤੇਰੀ ਇੱਕੋ ਸੈਨਤ ਤੇ
ਬੱਦਲ ਵਰ ਪਏ ਤੇਰੇ ਇਕ ਇਸ਼ਾਰੇ ਤੇ।
ਪਿਆਸ ਮੇਰੀ ਦੀ ਸੀਮਾਂ ਵਧਦੀ ਜਾਂਦੀ ਹੈ
ਘਰ ਹੈ ਮੇਰਾ ਭਾਵੇਂ ਨਦੀ ਕਿਨਾਰੇ ਤੇ।
____________________
440
« on: December 12, 2011, 12:28:59 AM »
ਅੱਖਾਂ ਵਿਚਲੀ ਚੁੱਪ ਵਾਂਗੂ ਤੂੰ ਮਿਲੀਂ।
ਮੀਂਹ 'ਚ ਨਿਕਲੀ ਧੁੱਪ ਵਾਂਗੂ ਤੂੰ ਮਿਲੀਂ।
ਸ਼ੋਰ ਤੇ ਹੰਗਾਮਿਆਂ ਦੀ ਜ਼ਿੰਦਗੀ ਵਿੱਚ
ਕਬਰ ਦੀ ਇਕ ਚੁੱਪ ਵਾਂਗੂ ਤੂੰ ਮਿਲੀਂ।
ਸਰਦ ਮੌਸਮ ਵਿੱਚ ਨਿੱਘੇ ਪਿਆਰ ਜਿਹੀ
ਕੋਸੀ ਕੋਸੀ ਧੁੱਪ ਵਾਂਗੂ ਤੂੰ ਮਿਲੀਂ।
ਬਰਫ਼ ਵਿੱਚ ਲੱਦੇ ਸਦਾ ਰਹਿੰਦੇ ਨੇ ਜੋ
ਪਰਬਤਾਂ ਦੀ ਚੁੱਪ ਵਾਂਗੂ ਤੂੰ ਮਿਲੀਂ।
ਅੱਗ ਦੇ ਵਿੱਚ ਸ਼ਹਿਰ ਸਾਰਾ ਜਲਣ ਬਾਦ
ਕਰਫਿਊ ਦੀ ਚੁੱਪ ਵਾਂਗੂ ਤੂੰ ਮਿਲੀਂ।
ਪਰਬਤਾਂ ਤੋਂ ਡਿਗਕੇ ਢਹਿ ਕੇ ਖੜ੍ਹ ਗਈ
ਇੱਕ ਨਦੀ ਦੀ ਚੁੱਪ ਵਾਂਗੂ ਤੂੰ ਮਿਲੀਂ।
__________________
Pages: 1 ... 17 18 19 20 21 [22] 23 24 25 26 27 ... 40
|
Show Posts