ਸੜਕੇ-ਸੜਕੇ ਜਾਂਦਿਆ ਸੁਣ ਰਾਹੀਆ ਵੇ
ਕਾਹਤੋਂ ਗੱਡੀ ਐਨੀ ਤੇਜ਼ ਭਜਾਈਐ ਵੇ
ਨਾ ਪਹੁੰਚਣ ਦੇ ਨਾਲੋਂ ਹੁੰਦੀ ਦੇਰ ਭਲੀ
ਕਿਉਂ ਨਾ ਪੈਂਦੀ ਖਾਨੇ ਗੱਲ ਸ਼ੁਦਾਈਆ ਵੇ
ਲਗਦੈ ਕਿਧਰੇ ਅਕਲ ਗਵਾਈ ਫਿਰਦਾ ਏਂ
ਨੰਬਰ ਦੀ ਥਾਂ ਗੋਤ ਲਿਖਾਈ ਫਿਰਦਾ ਏਂ
ਸੁੱਕਣੇ ਪਾ ਕੇ ਜਾਨ ਦੂਜਿਆਂ ਰਾਹੀਆਂ ਦੀ
ਗੱਡੀ ਨੂੰ ਜਹਾਜ਼ ਬਣਾਈ ਫਿਰਦਾ ਏਂ
ਸਿੱਖ ਲੈ ਕੁਝ ਅਸੂਲ ਸੜਕ ’ਤੇ ਚੱਲਣ ਦੇ
ਹਾਦਸਿਆਂ ਦੀ ਵਧਦੀ ਗਿਣਤੀ ਠੱਲ੍ਹਣ ਦੇ
ਤੇਰੇ ਵਰਗਾ ਅੱਗਿਓਂ ਜੇ ਕੋਈ ਟੱਕਰ ਪਿਆ
ਦਰਦ ਵਿਛੋੜੇ ਦਾ ਕਿੰਜ ਮਾਪੇ ਝੱਲਣਗੇ
ਦੋ ਪਹੀਏ ’ਤੇ ਚੜ੍ਹੀਏ ਹੈਲਮਟ ਪਾ ਕੇ ਵੇ
ਸਫ਼ਰ ਕਾਰ ਦਾ ਕਰੀਏ ਬੈਲਟ ਲਗਾ ਕੇ ਵੇ
ਨੁਕਸ ਪੈਣ ’ਤੇ ਗੱਡੀ ਸੜਕੋਂ ਲਾਹ ਲਈਏ
ਧੁੰਦ ਹੋਵੇ ਤਾਂ ਰੱਖੀਏ ਲਾਈਟ ਜਗਾ ਕੇ ਵੇ
ਬਿਨਾਂ ਲੋੜ ਤੋਂ ਹਾਰਨ ਕਦੇ ਵਜਾਈਏ ਨਾ
ਲੇਨ ਤੋੜ ਕੇ ਮਿੱਤਰਾ ਜਾਮ ਲਗਾਈਏ ਨਾ
ਰੱਖੀਏ ਦੂਰ ਮੋਬਾਈਲ ਡਰਾਈਵਿੰਗ ਕਰਨ ਸਮੇਂ
ਪੀ ਕੇ ‘ਦਾਰੂ’ ਗੱਡੀ ਕਦੇ ਚਲਾਈਏ ਨਾ
ਸੜਕੀ ਚਿੰਨ੍ਹਾਂ ਨੂੰ ਵੀ ਸਿੱਖ ਲੈ ਪੜ੍ਹਨਾ ਤੂੰ
ਸਿੱਖ, ਇਸ਼ਾਰਾ ਮੁੜਨ ਤੋਂ ਪਹਿਲਾਂ ਕਰਨਾ ਤੰੂ
ਰਾਤ ਦੇ ਵੇਲੇ ਸਿੱਖ ਲੈ ਡਿੱਪਰ ਦੇਣੀ ਵੇ
ਲਾਲ ਬੱਤੀ ’ਤੇ ਸਿੱਖ ਲੈ ਰਾਹੀਆ ਖੜ੍ਹਨਾ ਤੰੂ
ਸੜਕੇ-ਸੜਕੇ ਜਾਂਦਿਆ ਸੁਣ ਰਾਹੀਆ ਵੇ
ਕਾਹਤੋਂ ਗੱਡੀ ਐਨੀ ਤੇਜ਼ ਭਜਾਈਐ ਵੇ
ਨਾ ਪਹੁੰਚਣ ਦੇ ਨਾਲੋਂ ਹੁੰਦੀ ਦੇਰ ਭਲੀ
ਕਿਉਂ ਨਾ ਪੈਂਦੀ ਖਾਨੇ ਗੱਲ ਸ਼ੁਦਾਈਆ ਵੇ
_____________________

hon nu tan sab kuch ho sakda je asi caahiye,,