hava bhi Khushagavar hai,
 gulon pe bhi nikhar hai
taranum-e- hazar ha,
 bahar pur bahar hai
kahan chala hai saqiya,
 idhar to Laut idhar to aa
are ye dekhata hai kya,
 utha subu, subu utha


subu uthaa piyala bhar,
 piyala bhar ke de idhar
chaman ki simt kar nazar,
saman to dekh beKhabar
vo kali-kali badaliyan ,
 ufaq pe ho gai ayan
vo ik hajum-e-maikashan hai
 su-e-maikada ravan
ye kya guman hai badaguman,
 samajh na mujhako natavan
Khayal-e-zohd abhii kahan
 - abhi to main javan hun


ibadaton ka zikr hai,
 nijat ki bhi fikr hai
junun hai shbab kaa,
 Khayal hai azab ka
magar suno to shaiKh ji,
 ajib shai hain aap bhi
bhalaa shabab-o-ashiqi,
 alag hue bhi hain kabhi


hasin jalavarez hon,
 adayen fitanakhez hon
havayen itr abez hon,
 to shauq kyun na tez hon
nigaarahaa-e-fitanaagar koi idhar,
 koi udhar
ubharate ho aish par,
 to kya kare koi bashar
chalo ji qisa muKhtasar,
tumhara nukta-e-nazar
durust hai to ho, magar -
 abhi to main javaan hoon


na Gam kashud-o-bast ka,
 boland ka na past ka
na buud ka na hast ka,
na vada-e-alast ka
ummiid aur yas gum,
 havas gum qayas gum
nazar se aas-paas gum,
 hamaa bajuz gilas gum


na may mn kuchh kami rahe,
qada se hamadami rahe
nishast ye jami rahe,
 yahi hamahami rahe
vo raag ched mutariba,
 tarab-fiza alam-ruba
asar sada-e-saaz ka,
 jigar mn aag de laga
har ik lab pe ho sada
na haath rok saqiya
pilaeye ja pilaaye ja,
 pilaye jaa pilaye ja


Abhi to Main JAWAN Hoon

ye gasht kohasar ki,
 ye sair ju-e-var ki
ye bulbulon ke chahachahe,
 yeh gulrukhon ke qahqahe
kisi se mel ho gaya,
 to ranj-o-fikr kho gaya
kabhi jo vaqt so gaya,
ye hans gaya vo ro gaya


ye ishq ki kahaniyan,
 ye ras bhari javaniyan
udhar se meharabaniyan,
idhar se lantaraniyan
ye asaman ye zamiin,
 nazaraha-e dilanashin
unhen hayaat afariin,
bhala main chhor do yahiin
hai maut is qadar qariin,
 mujhe na ayega yaqiin
NAhi Nahi Abhi Nahi,
 NAhi Nahi Abhi Nahi

Abhi to Main JAWAN Hoon