ਮੁੜ ਪਿਆ ਹਾਂ ਤੇਰੇ ਸ਼ਹਿਰ ਵੱਲ
ਅੱਜ ਮੁੜ ਪਿਆ ਹਾਂ ਤੇਰੇ ਸ਼ਹਿਰ ਵੱਲ,
ਕੁੱਝ ਪੁਰਾਣੀਆਂ ਯਾਦਾਂ ਦਾ ਬੁਲਾਵਾ ਆਇਆ ਏ,
ਸੱਚ-ਮੁੱਚ ਹੀ ਕਿਸੇ ਯਾਦ ਕੀਤਾ ਏ ਮੈਨੂੰ,
ਜਾਂ ਫਿਰ ਐਵੇਂ ਹੀ ਕੋਈ ਛਲਾਵਾ ਆਇਆ ਏ...
ਜਾਵਾਂਗਾ ਹਰ ਓਸ ਥਾਂ ਤੇ ਜਿੱਥੇ ਆਪਾਂ ਮਿਲੇ ਸੀ,
ਛੂਹਵਾਂਗਾ ਹਰ ਓਸ ਫੁੱਲ ਨੂੰ ਜੋ ਜੋਬਨ ਰੁੱਤੇ ਖਿਲੇ ਸੀ,
ਓਹਨਾ ਪੱਤਿਆਂ ਚੋਂ ਲੱਭਾਂਗਾ ਤੇਰੀ ਖੁਸ਼ਬੂ ਨੂੰ,
ਜੋ ਤੇਰੀ ਮਹਿਕ ਦੇ ਝੋਕਿਆਂ ਨਾਲ ਹਿੱਲੇ ਸੀ....
ਓਸ ਮਜਾਰ ਤੇ ਦੁਆ ਕਰਨੀ ਏ ਅੱਜ ਫੇਰ ਇੱਕ ਵਾਰੀ,
ਜਿੱਥੇ ਕੱਠਿਆਂ ਨੇ ਰੱਬ ਕੋਲੋਂ ਬੜਾ ਕੁੱਝ ਮੰਗਿਆ ਸੀ,
ਓਸ ਦਰਿਆ ਕਿਨਾਰੇ ਪਿਆਸ ਬੁਝਾਉਣੀ ਏ ਦਿਲ ਦੀ,
ਜਿਹੜਾ ਕਦੇ ਤੇਰੇ ਪੈਰਾਂ ਨੂੰ ਛੂੰਹਦੇ ਅੱਗੇ ਲੰਘਿਆ ਸੀ....
ਤੇਰੀ ਬਾਤ ਪੁੱਛਾਂਗਾ ਓਹਨਾਂ ਚਿੜੀਆਂ ਪੰਛੀਆਂ ਤੋਂ,
ਜੋ ਅੱਜ ਵੀ ਤੇਰੇ ਬੋਲ ਸੁਣਨ ਨੂੰ ਤਰਸਦੇ ਨੇ,
ਬਚਪਨ ਦਾ ਅਹਿਸਾਸ ਹੋਵੇਗਾ ਗੁੱਡੀਆਂ ਪਟੋਲਿਆਂ ਨੂੰ ਛੂਹ ਕੇ,
ਜੋ ਅੱਜ ਵੀ ਤੇਰੇ ਪੁਰਾਣੇ ਘਰ ਦੀ ਕੰਧ ਤੇ ਲਟਕਦੇ ਨੇ....
ਇਹਨਾਂ ਸਿਆਸਤਦਾਨਾਂ ਹੱਥੋਂ ਮਜਬੂਰ ਦਿਲਾਂ ਨੂੰ,
ਇੱਕ ਸਾਂਝੀ ਧਰਤੀ ਤੇ ਕਦੇ ਤਾਂ ਰੈਣ ਵਸੇਰਾ ਮਿਲੇਗਾ,
ਓਸ ਕਹਿਰ ਦੀ ਅੱਗ ਵਿੱਚ ਸੜ ਚੁੱਕੇ ਬੂਟਿਆਂ ਚੋਂ,
ਮੈਨੂੰ ਆਸ ਏ ਕਿ ਕੋਈ ਪਿਆਰ ਦਾ ਫੁੱਲ ਜਰੂਰ ਖਿਲੇਗਾ....
ਵੰਡ ਮੁਲਕ ਦੀ ਨਈਂ ਪਿਆਰ ਕਰਨ ਵਾਲਿਆਂ ਦੀ ਹੋਈ ਸੀ,
ਜਿਹੜੀ ਬਹੁਤ ਸਾਰੇ ਸਿਰਨਾਵੇਂ ਮਿਟਾ ਕੇ ਤੁਰ ਗਈ ਸੀ,
ਕਿਸੇ ਦੱਸਿਆ ਮੈਨੂੰ ਤੇਰੇ ਸ਼ਹਿਰ ਵਿੱਚੋਂ ਸੋਹਣੀਏ ਨੀ,
ਤੂੰ ਵੀ ਮੈਨੂੰ ਉਡੀਕ-ਉਡੀਕ ਕੇ ਮੁੜ ਗਈ ਸੀ....
ਇੱਕ ਦੂਜੇ ਨਾਲ ਆਪਣਾ ਨਾਮ ਹਮੇਸ਼ਾ ਬੋਲੇਗਾ,
ਇਹ ਰੂਹਾਂ ਦਾ ਰਿਸ਼ਤਾ ਹਰ ਜਨਮ ਚ ਜੁੜਿਆ ਰਹੇਗਾ,
“ ਕਾਲਾ “ ਤਾਂ ਮੁੜ ਚੱਲਿਆ ਤੈਨੂੰ ਲੱਭ-ਲੱਭ ਕੇ ਸੋਹਣੀਏ,
ਪਰ ਹਰ ਰੋਜ ਕੋਈ ਆਪਣੀ ਮਹਿਬੂਬ ਦੇ ਸ਼ਹਿਰ ਵੱਲ ਤੁਰਿਆ ਰਹੇਗਾ.....
Show Posts