Harf-e-tauba humein sikha phir se,
Humein dikhlaa raah-e-khuda phir se,

Le kar apni panaah main ya rab,
Humein Shaitaan se bachaa phir se,

Phir sunaa de humain naveed-e-bahisht*,
Naar-e-dozakh* se bhi daraa phir se,

Hum bhatakne lage hain dikha de,
Aye khuda seedha raasta phir se,

Jaise ki thi mere bazurgon ki,
Kar qabool aise hi meri dua phir se,

Fikar taaza ho jis ki khusbhuu se,
Phool gulshan main aisa khilaa phir se

Kal chodhween ki raat thi,
 shab bhar raha charcha tera,
Kuch ne kaha yeh chaand hai,
 Kuch ne kaha chehra tera,

Hum bhi wahin mojood they,
 hum se bhi sab poocha ke yeh,
Hum hanss diye hum chup rahe,
 manzoor tha parda tera,

Iss sheher mein kis se milen,
hum se to choottin mehfilein,
Har shakss tera naam le,
 har shakss deewana tera,

Bedard! sunte ho to chal,
 kehta hai kya achi ghazal,
Aashiq tera, ruswaa tera,
 shaayer tera, Insha tera..

Sazaa ka haal sunaayen jazaa ki baat karen,
Khudaa mila ho jinhe woh khudaa ki baat karen,

Unhen pata bhi chale aur woh khafaa bhi na hon,
Iss ehtiyaat se kya mudaa.aa ki baat karen,

Hamare ehd ki tehzeeb mei qabaa hi nahin,
Agar qabaa ho to band-e-qabaa ki baat karen,


Har ek daur ka mazhab neyaa khuda laaya,
Karen to hum bhi magar kis khuda ki baat karen,

Wafaa-shuaar keyi hain koi haseen bhi to ho,
Chalo phir aaj ussi bewafaa ki baat karen..