ਸਾਰੇ ਦੋਸਤਾਂ ਨੂੰ ਸਤਿ ਸਿਰੀ ਅਕਾਲ ਪਰਵਾਨ ਹੋਵੇ /
ਮੇਰੀ ਹੌਸਲਾ ਅਫਜਾਈ ਲਈ ਬਹੁਤ ਬਹੁਤ ਧੰਨਵਾਦ /
ਤੁਹਾਡੀ ਕਚਿਹਰੀ ਵਿੱਚ ਇੱਕ ਵਾਰ ਫਿਰ ਹਾਜ਼ਰੀ ਦੇ ਰਿਹਾ ਹਾਂ , ਕਬੂਲ ਕਰਨਾ. /
ਏਸੇ ਤਰਾਂ ਪਿਆਰ ਦਿੰਦੇ ਰਹਿਣਾ ਜੀ / ਤੁਹਾਡਾ ਆਪਣਾ / •••KAMLA PUNJABI•••

ਗ਼ਜ਼ਲ
ਜਦ ਤਕ ਦਿਲ ਵਿਚ ਧੜਕਨ ਦਾ ਇਕਤਾਰਾ ਵੱਜਦਾ ਹੈ /
ਰੱਬ ਦਾ ਬੰਦਾ ਹਰ ਪਲ ਮੇਰਾ ਮੇਰਾ ਜਪਦਾ ਹੈ /

ਜਿਸ ਦੇ ਦਿਲ ਵਿਚ ਬਿਰਹਾ ਦਾ ਕੋਈ ਦੀਵਾ ਜਗਦਾ ਹੈ /
ਉਸ ਨੂੰ ਸਭ ਦਾ ਹਰ ਗ਼ਮ ਅਪਨਾ ਅਪਨਾ ਲਗਦਾ ਹੈ /

ਲਾਗੇ ਬਹਿ ਕੇ ਦੁੱਖ ਸੁੱਖ ਫੋਲੇ ਏਨਾ ਵਕਤ ਨਹੀਂ ,
ਦੇਖਣ ਨੂੰ ਤਾਂ ਮੇਰਾ ਉਸਦਾ ਡੂੰਘਾ ਰਿਸ਼ਤਾ ਹੈ /

ਬੇਗਾਨੇ ਤੇ ਵੈਸੇ ਤਾਂ ਕੋਈ ਮਾਣ ਨਹੀਂ ਹੁੰਦਾ,
ਜੋ ਹਮਦਰਦ ਬਣੇ ਉਹ ਥੋੜਾ ਅੱਛਾ ਲਗਦਾ ਹੈ /

ਅਣਜਾਣੇ ਵਿਚ ਠੋਕਰ ਲੱਗ ਜਾਂਦੀ ਏ ਹਰ ਇੱਕ ਨੂੰ,
ਸੰਭਲ ਸੰਭਲ ਬੇਸ਼ਕ ਉਹ ਪੱਬ ਚੁੱਕਦਾ ਰੱਖਦਾ ਹੈ /

ਖਿੜ ਖਿੜ ਹੱਸੇ ਕੁਝ ਨਾ ਦੱਸੇ ਤੂੰ ਕੀ ਜਾਣੇਗਾ ,
ਉਸਦੇ ਅੰਦਰ ਕੀ ਕੀ ਸੜਦਾ , ਬਲਦਾ , ਧੁਖਦਾ ਹੈ /

ਭੀੜ ਬੜੀ ਏ 'ਕੱਠੀ ਰਿਸ਼ਤੇ ਨਾਤੇ ਮਤਲਬ ਦੇ ,
ਇਹ ਤਾਂ ਰੋਣਾ ਪਿੱਟਣਾ ਤੇਰਾ ਮੇਰਾ ਸਭ ਦਾ ਹੈ /

ਅਪਣੇ ਘਰ ਵਿੱਚ ਜਿਸਦੀ ਕੋਈ ਪੁੱਛ ਪਰਤੀਤ ਨਹੀਂ ,
ਯਾਰਾਂ ਦੀ ਮਹਿਫਿਲ ਵਿੱਚ ਦਾਨਾ ਬੀਨਾ ਬਣਦਾ ਹੈ /

ਹੁਣ ਤਾਂ ਗਰੀਬਾਂ ਉੱਤੇ , ਉੱਤੇ ਵਾਲਾ ਮਿਹਰ ਕਰੇ ,
ਥੱਲੇ ਵਾਲਾ ਹਾਕਮ ਨਾ ਕੋਈ ਚੱਜ ਦਾ ਲੱਭਦਾ ਹੈ /

ਸਾਰੀ ਗੱਲ ਤਾਂ ਮੁੱਕਣੀ ' ਮਹਿਰਮ ' ਆਖਿਰ ਅਮਲਾਂ ਤੇ,
ਬਾਬੇ ਦੀ ਬਾਣੀ ਦਾ ਬੇਸ਼ੱਕ ਦਰਿਆ ਵਗਦਾ ਹੈ /